إضافة وظيفة مصمم جرافيك فى بطاقة الرقم القومى
 |
| إضافة وظيفة مصمم جرافيك فى البطاقة الشخصية |
إضافة وظيفة مصمم جرافيك فى البطاقة الشخصية
اكيد انت كـ فريلانسرز أو شغال في شركة مثلاً ، أكيد محدش مأمن عليكم ، يعني مثلا لما تيجوا تجددوا بطاقتكم وتضيفوا وظيفة مصمم جرافيك ، هتلاقوا الرد بسيط وهو انك تجيب الاستمارة وتمضيها من التأمينات لو انت متأمن عليك ، وطبعاً لو انت مش متأمن عليك فبالتالي الموضوع مش هيتم ومش هتعرف تضيف الوظيفة .
لكن لوأنت متأمن عليك ممكن تاخد الاستمارة وتمضيها وتختمها في التأمينات لكن هتتختم مصمم جرافيك بإسم الهيئة اللى انت تابع اليها ,
طيب لو انت مكنتش شغال فى شركة هتعمل ايه !!
فى الحالة دي يا سيدى الدولة بتقدملك خدمة اسمها 'مزاولة مهنة',
ومن هنا هنبدأ خطوات شرح ازاى تضيف وظيفة مصمم جرافيك فى بطاقة الرقم القومى , طبعا انا من اسكندرية ف هحكيلكم اللي حصل معايا بالتفصيل :
خطوات التقديم على مزاولة مهنة مصمم جرافيك :
(1) هتروح مديرية القوي العاملة والهجرة ( وميكونش مكتب صغير ) لا الإدارة العامة نفسها ( انا روحت الاقرب بالنسبالي وكان عنوانها ١٩ شارع مصطفي كامل - عزبة سعد - سيدي جابر ) ودا شكلها من برا وكمان دا اللوكيشن بتاعها .
 |
| مكتب مديرية القوي العاملة والهجرة بالإسكندرية |
(2) هتدخل علي الشباك وتقولهم انك عايز تعمل ترخيص مزاولة مهنة , و طبعا هتحددلهم المهنة مصمم جرافيك .
(3) بعد كدا هيطلب منك الرقم التأميني بتاعك ( ودا بتجيبه الكتروني من موقع التأمينات والشرح من هنا ) , وهيطلب البطاقة بتاعتك و ٧٠ جنيه ايصال خدمة .
(4) بعد كدا هتستني شوية وينادي علي اسمك ويديلك استمارة اختبار شبه اللي ف الصورة وفيها الميعاد والمكان اللي هتختبر فيه ، وهيقولك تطلع تشترك في النقابة .
 |
| استمارة اختبار شهادة مزاولة مهنة مصمم جرافيك |
(5) هتطلع مبني النقابة تسجل فيه وتدفع اشتراك عضوية تمنه ٣٥جنيه , وهتاخد ايصال عضوية نقابة وشهادة عضوية ( الايصال دا تحتفظ بيه عشان دا اللي هتغير بيه البطاقة الشخصية بتاعتك ولما تيجي تختم ختم النسر هتختم من النقابة )
 |
| ايصال عضوية نقابة وشهادة عضوية مصمم جرافيك |
(6) وبعدها هتروح بقي مكان الاختبار اللي متحدد ليك في الوقت والتاريخ اللي مكتوب ( يعني انا كان الاختبار بتاعي في مركز تدريب مهني محرم بك وعنوانه ١٠٠ شارع محسن باشا - محرم بك - الاسكندرية ) ودا شكل المركز من برا ودا اللوكيشن بتاعه .
 |
| مركز تدريب مهنى محرم بك المطور بالإسكندرية |
(7) هتروح الإمتحان وهحكيلك بالتفصيل حصل معايا ايه !
(8) بعدها هيقولك تعالى كمان 10 ايام تستلم الشهادة والكارنيه بتوعك وشكلهم زي الصورة ومبروك عليك يا معلم .
 |
| شهادة وكارنيه مزاولة مهنة مصمم جرافيك |
الأمتحان عبارة عن ايه ؟
بص يا سيدى هتدخل لاب فيه حوالى 6 أجهزة كمبيوتر بيدخلك شخصين فى المرة الإختبار الواحد , بعدها مثلا لما انا دخلت طلب منى انى اعمل تصميم لغلاف كتاب بيتكمل عن أي حاجة وأبدع يا معلم , بعدها المراقب هيفضل يسألك شغال على برامج ايه وبقالك قد ايه فى المجال واشتغلت فين قبل كدا مثلا , وبيفضل يسأل أسئلة عشان يقيمك وهيسيبك حوالى 10 دقايق ويرجعلك يقولك تمام كدا شكرا حتي لو انت مخلصتش التصميم هو بيبقي عنده نظرة فيك وبيقيمك كويس وبيشوف انت فعلا فاهم فى المهنة ولا كدب وخلاص .
